Tickerاخبارسب کے لیے سب کچھ

پی ڈی ایم نے 16 اکتوبر سےملک بھر میں جلسوں کا شیڈول جاری کردیا

اپوزیشن کے اتحاد پاکستان ڈیموکریٹک موومنٹ (پی ڈی ایم) کے تنظیمی ڈھانچے اور  جلسوں کے شیڈول کا اعلان کردیا گیا۔

پی ڈی ایم کی سٹیئرنگ کمیٹی کا اجلاس احسن اقبال کی سربراہی میں ہوا جس میں تنظیمی ڈھانچے اور حکمت عملی پر غور کیا گیا اور کئی اہم فیصلے کیے گئے۔ سابق وزیر اعظم راجہ پرویز اشرف سینیئر نائب صدر اور شاہد خاقان عباسی سیکرٹری جنرل ہوں گے جب کہ سیکرٹری اطلاعات عوامی نیشنل پارٹی کے میاں افتخار ہوں گے۔

اس کے علاوہ اپوزیشن اتحاد نے جلسوں کا بھی نیا شیڈول جاری کردیا ہے جس کا اعلان احسن اقبال نے کیا۔ انہوں نے کہا کہ پی ڈی ایم کے جلسوں کا آغاز 16 اکتوبر کو گوجرانوالا سے ہوگا جس کے بعد دوسرا جلسہ 18 اکتوبر کو کراچی میں ہوگا۔ انہوں نے بتایا کہ کراچی اور کوئٹہ کے پروگرام متصادم تھے اور اب کوئٹہ میں پی ڈی ایم کا جلسہ 25 اکتوبر کو ہوگا جب کہ 22 نومبر کو پشاور، 30 نومبر کو ملتان اور 13 دسمبر کو لاہور میں عوامی طاقت کا مظاہرہ کیا جائے گا۔

سیکرٹری جنرل پی ڈی ایم شاہد خاقان عباسی کا کہنا تھا کہ ہمارا مقصد صرف عوام کو ریلیف دینا ہے اور ہمارا مطالبہ ہےکہ ملک آئین کے مطابق چلے۔

خیال رہے کہ پاکستان ڈیموکریٹک موومنٹ کے سربراہ مولانا فضل الرحمان ہیں۔ پی ڈی ایم کا پہلا جلسہ 11 اکتوبر کو کوئٹہ میں ہونا تھا جو کہ ملتوی کرکے 18 اکتوبر کو رکھا گیا تھا لیکن اس پر پیپلزپارٹی کے تحفظات تھے جس کے بعد اب کوئٹہ میں 25 اکتوبر کو جلسہ ہوگا۔

Related Articles

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Back to top button